वीरगञ्ज। पर्सागढी नगरपालिका–७ चैनपुर निवासी स्वर्गीय राकेश कुमार पटेलको पार्थिव शरीर करिब तीन महिनापछि शुक्रबार राति नेपाल ल्याइएको छ। विभिन्न कानुनी तथा प्राविधिक प्रक्रिया पूरा गर्न समय लागेपछि ढिलाइ भए पनि अन्ततः उनको शव काठमाडौँ आइपुगेको हो।
२९ वर्षीय पटेल गत चैत २० गते अस्ट्रेलियाको ताज्मानियास्थित आफ्नै निवासमा मृत अवस्थामा फेला परेका थिए। रोजगारीका लागि अस्ट्रेलिया पुगेका उनको मृत्युको कारणबारे हालसम्म आधिकारिक रूपमा विस्तृत जानकारी सार्वजनिक भएको छैन। घटनापछि अस्ट्रेलियास्थित नेपाली दूतावासले परिवारलाई जानकारी गराएको थियो।
छोराको पार्थिव शरीर स्वदेश ल्याइदिन माग गर्दै उनका पिता ब्रिजा राउत कुर्मीले २०८३ वैशाख २३ गते परराष्ट्र मन्त्रालयमा निवेदन दिएका थिए। लामो समयसम्म प्रक्रिया अघि नबढेपछि परिवारले चिन्ता व्यक्त गर्दै सम्बन्धित निकायसँग निरन्तर पहल गरिरहेको थियो।
यसैबीच, पर्सा निर्वाचन क्षेत्र नम्बर–२ का प्रतिनिधिसभा सदस्य सुशील कुमार कानुले असार १८ गते प्रतिनिधिसभा बैठकमा उक्त विषय उठाउँदै नेपाली नागरिकको शव सम्मानपूर्वक स्वदेश ल्याउन सरकारले आवश्यक समन्वय र पहल गर्नुपर्ने माग गरेका थिए।
सांसद कानुले संसद्मा विषय उठाएपछि परराष्ट्र मन्त्रालयले सम्बन्धित निकायसँग समन्वय तीव्र बनाएको थियो। अस्ट्रेलियामा रहेका नेपाली समुदायले समेत आवश्यक परे आर्थिक सहयोग संकलन गरेर शव स्वदेश पठाउने तयारी गरेका थिए। त्यसपछि शव नेपाल ल्याउने प्रक्रिया तीव्र गतिमा अघि बढेको थियो।
शुक्रबार राति काठमाडौँ आइपुगेको पार्थिव शरीर परिवारजनले बुझिसकेका छन्। त्यसपछि अन्तिम श्रद्धाञ्जलीका लागि पार्थिव शरीर पर्सागढी–७ चैनपुरस्थित निवासतर्फ लगिएको छ। आज शनिबार चैनपुरमै अन्तिम श्रद्धाञ्जली तथा अन्त्येष्टि गरिने परिवारले जनाएको छ।
लगभग तीन महिनादेखि अन्तिम दर्शनको प्रतीक्षामा रहेका परिवारका लागि पार्थिव शरीर स्वदेश आइपुग्नु अत्यन्त भावुक क्षण बनेको छ। शव स्वदेश ल्याउने प्रक्रियामा सहयोग पुर्याउने सबैप्रति परिवारले आभार व्यक्त गरेको छ।
स्वर्गीय राकेश कुमार पटेलप्रति हार्दिक श्रद्धाञ्जली तथा शोकसन्तप्त परिवारजनमा गहिरो समवेदना।
