२४ वर्षपछि राजदरबार हत्याकाण्डमा नयाँ मोड, थप छानबिन अघि बढाउन गृहमन्त्री गुरुङको निर्णय

राष्ट्रिय

गृहपृष्ठ
राष्ट्रिय
२४ वर्षपछि राजदरबार हत्याकाण्डमा नयाँ मोड, थप छानबिन अघि बढाउन गृहमन्त्री गुरुङको निर्णय

२४ वर्षपछि राजदरबार हत्याकाण्डमा नयाँ मोड, थप छानबिन अघि बढाउन गृहमन्त्री गुरुङको निर्णय

मंगलबार, जेठ २६, २०८३ सुर्या दैनिक न्यूज डेस्क

काठमाडौं । गृहमन्त्रीको शपथ लिएर पदभार ग्रहण गरेको केही घण्टामै गृहमन्त्री सुदन गुरुङले अप्रत्याशित र दूरगामी प्रभाव पार्न सक्ने निर्णय गरेका छन्। देशकै सबैभन्दा चर्चित र रहस्यमय घटनामध्ये एक मानिने राजदरबार हत्याकाण्डको थप छानबिन प्रक्रिया अघि बढाउने निर्णय गर्दै गुरुङले राजनीतिक वृत्त र आम नागरिकको ध्यान एकाएक आफ्नोतर्फ तानेका छन्।

वर्षौंदेखि विभिन्न प्रश्न, आशंका र विवादको केन्द्रमा रहेको राजदरबार हत्याकाण्डबारे पुनः अनुसन्धानको प्रक्रिया अघि बढाउने संकेतसँगै घटनाको सत्यतथ्य बाहिर ल्याउने बहस फेरि तातेको छ। यसअघि बनेका आयोगका प्रतिवेदनमाथि समेत प्रश्न उठ्दै आएका बेला नयाँ गृहमन्त्रीको यो कदमलाई ‘साहसी’ र ‘जोखिमपूर्ण’ दुवै रूपमा हेरिएको छ।

२०५८ साल जेठ १९ गते नारायणहिटी दरबारभित्र भएको हत्याकाण्डमा तत्कालीन राजा वीरेन्द्र, रानी ऐश्वर्यालगायत राजपरिवारका अधिकांश सदस्यको ज्यान गएको थियो। तर घटनाको वास्तविकता र त्यससँग जोडिएका अनेक प्रश्न आजसम्म पूर्ण रूपमा समाधान हुन सकेका छैनन्।

पदभार ग्रहण गरेलगत्तै गुरुङले लिएको यो निर्णयले अब राजदरबार हत्याकाण्डको फाइल फेरि राष्ट्रिय बहसको केन्द्रमा ल्याउने देखिएको छ। सत्यको खोजीमा सरकार साँच्चिकै अघि बढ्छ कि यो पनि केवल घोषणामै सीमित हुन्छ भन्ने प्रश्नको जवाफ भने आगामी दिनले दिनेछ।

प्रकाशित मिति: मंगलबार, जेठ २६, २०८३ १९:५१

प्रतिक्रिया दिनुहोस्