अवैध सम्बन्धको शंका: प्रहरी जवानलाई जालमा पारेर निर्मम हत्या

स्थानीय

गृहपृष्ठ
स्थानीय
अवैध सम्बन्धको शंका: प्रहरी जवानलाई जालमा पारेर निर्मम हत्या

अवैध सम्बन्धको शंका: प्रहरी जवानलाई जालमा पारेर निर्मम हत्या

मंगलबार, वैशाख १, २०८३ सुर्या दैनिक न्यूज डेस्क

पर्साको वीरगञ्ज महानगरपालिका–९ मा एक प्रहरी जवानको क्रूर हत्या भएको घटनाले क्षेत्र नै स्तब्ध बनेको छ। नेपाल प्रहरी का अनुसार कालिकामाई गाउँपालिका–१ मुडली घर भई सप्तरी जिल्ला प्रहरी कार्यालय मा कार्यरत २८ वर्षीय विकास चौरसियामाथि योजनाबद्ध आक्रमण गरिएको हो।

प्रहरीका अनुसार चौरसियालाई रानीघाटस्थित कोठामा बोलाएर धारिलो हतियार र फलामे रडले निर्घात कुटपिट गरिएको थियो। गम्भीर घाइते अवस्थामा फेला परेका उनलाई अस्पताल लैजाँदै गर्दा बाटोमै मृत्यु भएको पुष्टि भएको छ।

प्रारम्भिक अनुसन्धानले घटनाको जडमा विवाहेतर सम्बन्ध रहेको देखाएको छ। रौतहटका सन्तोष साहले आफ्नी पत्नी सोनी कुमारी साह र चौरसियाबीच सम्बन्ध रहेको थाहा पाएपछि जाल बुनेको खुलेको छ। सोही योजनाअनुसार चौरसियालाई कोठामा बोलाएर चार जनाले मिलेर आक्रमण गरेको प्रहरीको भनाइ छ।

घटनामा संलग्न रहेको आरोपमा सन्तोष साह, सोनी कुमारी साह, बाराको महागढी नगरपालिका–७ का विशाल साह र भारतको उत्तरप्रदेश, अलीगढ निवासी ओमवीर प्रजापति पक्राउ परेका छन्।

मृतक चौरसियाको शव पोस्टमार्टमका लागि नारायणी अस्पताल पठाइएको छ भने घटनाबारे थप अनुसन्धान जारी रहेको प्रहरीले जनाएको छ।

प्रकाशित मिति: मंगलबार, वैशाख १, २०८३ १०:५४

प्रतिक्रिया दिनुहोस्