मदेशि महिला पत्रकार प्रीयन्का दासको सम्मानजनक राजनीति प्रवेश

राष्ट्रिय

गृहपृष्ठ
राष्ट्रिय
मदेशि महिला पत्रकार प्रीयन्का दासको सम्मानजनक राजनीति प्रवेश

मदेशि महिला पत्रकार प्रीयन्का दासको सम्मानजनक राजनीति प्रवेश

बिहीबार, पुस १७, २०८२ सुर्या दैनिक न्यूज डेस्क

काठमाडौं — मदेशी महिला भएर पनि पत्रकारिता जस्तो चुनौतीपूर्ण क्षेत्रमा विगत १५ वर्षदेखि निरन्तर, निर्भीक र पेशागत रूपमा सक्रिय रहँदै आएकी पत्रकार प्रीयन्का दास लाई नेपाली काङ्ग्रेसले प्रतिनिधि सभाको समानुपातिक तर्फको बन्द सूचीमा समावेश गरेको छ। यो निर्णयलाई मदेशी समुदाय, महिला र पत्रकारिता क्षेत्रको लागि महत्वपूर्ण राजनीतिक सन्देशका रूपमा हेरिएको छ।
लामो समयदेखि मूलधारको सञ्चार माध्यममा आवाजविहीन समुदायका मुद्दा उठाउँदै आएकी दासले मधेश, महिला अधिकार, समावेशिता, लोकतन्त्र र प्रेस स्वतन्त्रताका सवालमा निरन्तर कलम चलाउँदै आएकी छिन्। पत्रकारिता क्षेत्रमा महिलामाथि हुने विभेद, मदेशी पहिचानमाथि हुने हेपाइ र अवसरको असमानताबीच पनि उनले आफ्नो पेशागत यात्रालाई विचलित हुन दिइनन्।
नेपाली काङ्ग्रेसले प्रीयन्का दासलाई समानुपातिक बन्द सूचीमा राख्नु केवल एउटा नाम समावेश गर्नु मात्र नभई समावेशी लोकतन्त्रप्रतिको प्रतिबद्धताको परीक्षा पनि हो। लामो समयदेखि “समावेशिता” को नारा दिने दलहरूले व्यवहारमा भने सीमित अनुहारहरूलाई मात्र प्राथमिकता दिँदै आएको आरोप लागिरहेको सन्दर्भमा दासको नामले सकारात्मक सन्देश दिएको छ।
राजनीतिक विश्लेषकहरूका अनुसार पत्रकारिताबाट आएका व्यक्तिहरूले संसदमा जनताको आवाज थप सशक्त रूपमा उठाउन सक्छन्। विशेषगरी दासजस्ता माटोबाट उठेका, संघर्षबाट खारिएका र समुदायका पीडालाई नजिकबाट बुझेका व्यक्तिको उपस्थिति संसदमा आवश्यक रहेको उनीहरूको भनाइ छ।
मधेश आन्दोलन, महिला अधिकार र प्रेस स्वतन्त्रताका विषयमा निरन्तर सक्रिय रहँदै आएकी प्रीयन्का दासको राजनीतिक यात्राले पत्रकारिता र राजनीतिबीचको दूरी घटाउने अपेक्षा गरिएको छ। अब उनको भूमिकाले काङ्ग्रेसले बोकेको समावेशी लोकतन्त्रको नारालाई व्यवहारमा कति उतार्छ भन्ने प्रश्न भने सार्वजनिक बहसको विषय बनेको छ।

प्रकाशित मिति: बिहीबार, पुस १७, २०८२ १९:४६

प्रतिक्रिया दिनुहोस्