मधेस सरकारको कडा निर्देशन: यातायात कार्यालयमा बिचौलिया निषेध, ढिलासुस्ती गर्नेमाथि कारबाही

राष्ट्रिय

गृहपृष्ठ
राष्ट्रिय
मधेस सरकारको कडा निर्देशन: यातायात कार्यालयमा बिचौलिया निषेध, ढिलासुस्ती गर्नेमाथि कारबाही

मधेस सरकारको कडा निर्देशन: यातायात कार्यालयमा बिचौलिया निषेध, ढिलासुस्ती गर्नेमाथि कारबाही

शुक्रबार, वैशाख ४, २०८३ सुर्या दैनिक न्यूज डेस्क

पर्सा-मधेस प्रदेश सरकारको श्रम तथा यातायात मन्त्रालयले यातायात व्यवस्था कार्यालयहरूमा देखिएको अव्यवस्था, ढिलासुस्ती र बिचौलियाको प्रभाव अन्त्य गर्न कडा ११ बुँदे निर्देशन जारी गरेको छ। सेवा प्रवाहलाई छिटो, पारदर्शी र सेवाग्राहीमैत्री बनाउन मधेस सरकारले स्पष्ट सन्देश दिएको हो।
निर्देशनअनुसार अब सबै यातायात कार्यालयमा टोकन प्रणाली अनिवार्य रूपमा लागू गरिनेछ, जसले सेवाग्राहीलाई अनावश्यक दुःख र झन्झटबाट मुक्त गर्ने अपेक्षा गरिएको छ। प्रहरीको सहकार्यमा ‘नो मिडलम्यान जोन’ घोषणा गरी बिचौलियाको प्रवेश पूर्ण रूपमा निषेध गरिनेछ।
हरेक कार्यालयमा हेल्पडेस्क, नागरिक वडापत्र र गुनासो पेटिका राख्नुपर्नेछ भने फेसबुकजस्ता सामाजिक सञ्जालमार्फत आएका गुनासालाई समेत तत्काल सम्बोधन गर्नुपर्ने व्यवस्था गरिएको छ। पारदर्शिता सुनिश्चित गर्न सूचना अधिकारीको नाम, पद र सम्पर्क नम्बर सार्वजनिक गर्न अनिवार्य गरिएको छ।
त्यसैगरी, पिउने पानी, सरसफाइ र पार्किङजस्ता आधारभूत सुविधामा सुधार गर्न निर्देशन दिइएको छ। प्रत्येक सेवाको समयसीमा निर्धारण गरिने र ढिलासुस्ती गर्ने कर्मचारीमाथि कडा कारबाही गरिने चेतावनी मन्त्रालयले दिएको छ।
सेवाग्राहीको अनुभव मापन गर्न सन्तुष्टि/असन्तुष्टि सर्वेक्षण लागू गरिनेछ भने कार्यालयका प्रत्येक कोठामा सेवा विवरण स्पष्ट देखिने गरी टाँस्नुपर्नेछ। मधेस सरकारको यो कदमले यातायात कार्यालयमा सेवा प्रणाली सुधार गर्ने विश्वास गरिएको छ।

प्रकाशित मिति: शुक्रबार, वैशाख ४, २०८३ २०:५७

प्रतिक्रिया दिनुहोस्