नर्मल डेलिभरीपछि सुत्केरीको मृत्यु, तराई अस्पतालविरुद्ध छानबिनको माग

स्थानीय

गृहपृष्ठ
स्थानीय
नर्मल डेलिभरीपछि सुत्केरीको मृत्यु, तराई अस्पतालविरुद्ध छानबिनको माग

नर्मल डेलिभरीपछि सुत्केरीको मृत्यु, तराई अस्पतालविरुद्ध छानबिनको माग

बुधबार, असार १७, २०८३ सुर्या दैनिक न्यूज डेस्क

वीरगञ्जस्थित तराई अस्पतालमा उपचारका क्रममा बिसरामपुर गाउँपालिका निवासी तथा हाल श्रीपुरमा बस्दै आएकी इन्दु कुमारी साहको मृत्यु भएपछि परिवारले अस्पताल प्रशासन र उपचारमा संलग्न चिकित्सकमाथि गम्भीर लापरवाहीको आरोप लगाएको छ।

मृतकका पति चन्दन साहका अनुसार इन्दु कुमारी साहको सामान्य (नर्मल) प्रसूति सफलतापूर्वक भएको थियो। तर त्यसपछि अचानक स्वास्थ्य अवस्था बिग्रिएको र भेन्टिलेटरमा राखेर उपचार गरिए पनि उनको ज्यान बचाउन नसकिएको उनले बताए।

चन्दन साहले उपचारमा संलग्न डाक्टर तर्नुम खातुन निजी क्लिनिकमा व्यस्त रहने र अस्पतालमा बिरामीको जिम्मा नर्स तथा अन्य स्वास्थ्यकर्मीको भरमा छाड्ने गरिएको आरोप लगाए। उनले यस्ता लापरवाहीका घटना पटक–पटक दोहोरिने गरेको दाबी गर्दै पहुँच र पैसाको आडमा दोषीमाथि कारबाही नहुने अवस्था रहेको आरोप पनि लगाए।

त्यस्तै, अस्पतालका सञ्चालक डा. रोशन कुर्मीको पनि व्यवस्थापकीय लापरवाही रहेको भन्दै घटनाको निष्पक्ष छानबिन गरी दोषी देखिने जो–कोहीमाथि कानुनबमोजिम कारबाही गर्न सम्बन्धित निकायसँग परिवारले माग गरेको छ।

यस घटनाबारे तराई अस्पताल, डाक्टर तर्नुम खातुन तथा डा. रोशन कुर्मीको आधिकारिक प्रतिक्रिया प्राप्त हुन बाँकी छ। उनीहरूको प्रतिक्रिया प्राप्त भएपछि समाचार अद्यावधिक गरिनेछ।

प्रकाशित मिति: बुधबार, असार १७, २०८३ १४:१८

प्रतिक्रिया दिनुहोस्